Jana Kura
काठमाडौँ, १२ मङ्सिर । विदेश रोजगारीका लागि खाडी मुलुकतर्फ उडान भर्ने नेपाली श्रमिकका लागि नेपाल वायुसेवा निगमले विशेष छुटसहित नयाँ भाडादर लागू गरेको छ। निगमले आज सार्वजनिक गरेको विज्ञप्तिअनुसार दमाम, दोहा, दुबई तथा मलेसियाको क्वालालाम्पुर जाने श्रमिक यात्रुहरूलाई पूर्वतयारी सहज बनाउन प्रत्येक उडानमा १० सिटमा १० प्रतिशत छुट उपलब्ध गराइने छ।
निगमले श्रमिक यात्रुको पहुँच र सहुलियतलाई प्राथमिकतामा राख्दै यस्तो व्यवस्था गरिएको स्पष्ट पारेको छ। आवश्यक कागजातसहित यात्रुहरूले निगमको नेपालस्थित कार्यालयका टिकट काउन्टरबाटै छुटसहितको सेवा सहजै प्राप्त गर्न सक्ने बताइएको छ।
सरकार मान्यताप्राप्त श्रम गन्तव्यतर्फ जाने नेपालीका लागि यो व्यवस्था उपयोगी हुने विश्वास निगमले व्यक्त गरेको छ। विदेशिया सपना पूरा गर्न घर छाडेर निस्कने श्रमिकहरूलाई केही आर्थिक राहत मिलोस् भन्ने उद्देश्यले गरिएको यो पहलप्रति धेरैले खुसी व्यक्त गर्ने अपेक्षा गरिएको छ।
