Jana Kura
काठमाडौँ, २६ कात्तिक। गत असोज ३१ गतेदेखि प्रदर्शनमा आएको नेपाली चलचित्र ‘जेरी अन टप’ २०८२ सालमा सर्वाधिक कमाइ गर्ने चलचित्र बनेको छ।
चलचित्र विकास बोर्डअन्तर्गतको ‘बक्स अफिस सिनेपा’ का अनुसार, गत शनिबारसम्म यस चलचित्रले रु ११ करोड ७१ लाख ४१ हजार ४९८ ग्रस कलेक्सन गरेको छ। बोर्डले सोमबार सार्वजनिक गरेको व्यावसायिक तथ्याङ्कका अनुसार यो वर्षका सबै चलचित्रमध्ये ‘जेरी अन टप’ सबैभन्दा बढी व्यवसाय गर्ने चलचित्र बनेको हो।
चलचित्रका निर्माता सरोज न्यौपानेले दर्शकले दिएको साथ र माया प्रति कृतज्ञता व्यक्त गर्दै आगामी दिनमा अझ राम्रो प्रदर्शन हुने विश्वास व्यक्त गर्नुभयो। उहाँले भन्नुभयो, “‘जेरी अन टप’ अझै प्रदर्शनरत छ, त्यसैले यसको व्यापारिक नतिजा अझ बढ्ने निश्चित छ। हाम्रो वितरकका अनुसार पनि वास्तविक कलेक्सन बोर्डको तथ्याङ्कभन्दा बढी छ। सगरमाथाको विषयवस्तुमा आधारित यो चलचित्रले घरेलु र प्रवास दुवै बजारमा दर्शकको अत्यधिक साथ पाएको छ, जुन हामी सबैका लागि खुशीको कुरा हो।”
यसअघि गत वैशाखमा प्रदर्शनमा आएको ‘ऊनको स्वीटर’ ले रु ११ करोड ४१ लाख ८८ हजार ७८० कमाइ गरेको थियो, जसलाई अहिले ‘जेरी अन टप’ ले उछिनेको हो।
सुयोग गुरुङ निर्देशित यो चलचित्रमा अनमोल केसी, आँचल शर्मा, जसिता गुरुङ, भुवन केसी, केदार घिमिरे (माग्ने बुढा) र उषा खड्गी लगायतका कलाकारको अभिनय रहेको छ।
