• Jana Kura

    • 2025-10-30

     

    काठमाडौँ, १३ कात्तिकः
    सडकमा गीत गाउँदै हिँड्ने एउटा सानो केटाबाट देशव्यापी चर्चित गायक बन्ने अशोक दर्जीको अद्भुत यात्रा अब पर्दामा देखिन लागेको छ। गायक तथा संगीतकार टङ्क बुढाथोकीको निर्देशनमा तयार गरिएको चलचित्र ‘मन बिनाको धन’ ले दर्जीको जीवन संघर्ष र सफलताको कथा जनतासामु ल्याउनेछ।

    चलचित्रमा दर्जीको ‘जिरोबाट हिरो’ बन्ने कथा देखाइनेछ । जसमा समाजमा धन र मनबीचको द्वन्द्व, मानवीय संवेदना र अवसर पाएको जीवनको मूल्यलाई कलात्मक रूपमा प्रस्तुत गरिएको छ।

    निर्देशक बुढाथोकीका अनुसार, चलचित्र पूर्ण रूपमा जीवनीमूलक नभए पनि दर्जीको वास्तविक जीवनका प्रमुख घटनाक्रमहरूकै आधारमा कथा तयार गरिएको हो। उहाँ भन्छन्,“सडकमा गीत गाउँदै हिँड्ने अशोकको जीवन परिवर्तनको कथा नै यस चलचित्रको आत्मा हो। यो मनोरञ्जन मात्र होइन, प्रेरणाको स्रोत पनि बन्नेछ।”

    चलचित्रमा अशोक दर्जीसँगै सरोज खनाल, सन्तोष पन्त, रमा थपलिया, नीता ढुङ्गाना, बुद्धी तामाङलगायत ख्यातिप्राप्त कलाकारहरूको अभिनय रहेको छ। कथा लेखन र निर्देशन टङ्क बुढाथोकीकै रहेकाले यसमा उनको भावनात्मक सम्बन्ध झल्किएको स्पष्ट देखिन्छ, जबकि पटकथा र संवाद शिवम अधिकारीले लेखेका हुन्।

    अशोक दर्जी हाल कक्षा ९ मा अध्ययनरत छन्। उनी भन्छन्,“मलाई सडकबाट ल्याएर गायक बनाउने व्यक्ति टङ्क दाइ हुनुहुन्छ। यो चलचित्रले मेरो संघर्ष मात्र होइन, अरूलाई पनि आशा र प्रेरणा दिनेछ।”

    चलचित्र ‘मन बिनाको धन’ यही कात्तिक २१ गतेदेखि नेपालका हलहरूमा र केही विदेशी स्थानहरूमा समेत प्रदर्शन हुने बताइएको छ।

     

    सिफारिस : सबै
    छुटाउनुभयो कि? सबै