❝ चलचित्र ‘होस्टेल–३’ भारतमा पनि लोकप्रिय ❞

काठमाडौँ, १२ कात्तिक / नेपाली चलचित्र ‘होस्टेल–३’ ले भारतमा प्रदर्शनको ५१ दिन पूरा गरेको छ । नेपालमा सफलताको शिखर चुमेको ‘होस्टेल’ शृङ्खलाको तेस्रो भागले अहिले सीमा नाघेर भारतीय नेपाली समुदायमा पनि लोकप्रियता कमाइरहेको छ ।

गत भदौ २० गतेदेखि भारतको दार्जिलिङस्थित एसभिएफ सिनेमा, रिङ्क मलमा निरन्तर प्रदर्शन भइरहेको उक्त चलचित्रले ५१ औं दिन पार गरेको भारतका वितरक सुरज खड्काले जानकारी दिनुभयो । भारतमा ‘होस्टेल–३’ को वितरण गोर्खा फिल्म प्रोडक्सन र सुपर सिनेमाले संयुक्त रूपमा गरेका हुन् ।

चलचित्र सिक्किम, दार्जिलिङ, सिलगुडी, सिन्ताम, गुवाहाटी, आसाम र मणिपुरसहित ५० भन्दा बढी हलमा एकैसाथ प्रदर्शन गरिएको थियो । निर्देशक सशान कँडेलले भारतमा पनि फिल्मले सफलता हासिल गरेकामा खुसी व्यक्त गर्दै भन्नुभयो, “सर्वप्रथम, यति ठूलो शृङ्खलाको निर्माणका लागि विश्वास प्रकट गर्नुभएको दुर्गिश फिल्म्सलाई धन्यवाद दिन चाहन्छु । साथै निर्माण, वितरण र प्रचारप्रसारमा संलग्न सबैप्रति हार्दिक आभार व्यक्त गर्दछु ।”

‘होस्टेल–३’ ले क्याम्पस जीवनका उतार–चढाव, प्रेम, मित्रता र सङ्घर्षका कथालाई प्रस्तुत गर्दै युवापुस्तामाझ विशेष चर्चा पाएको छ ।

चलचित्रमा पारसबम ठकुरी (कुलब्वाय), रिहान गिरी, पदम तामाङ, आशिष घिमिरे, सिम्रन पन्त, हेना नगरकोटी, समा पराजुली, उमर खान, सन्तोष बानियाँ र आशिष पुरुषलगायत कलाकारको अभिनय रहेको छ ।

चलचित्रका लेखक तथा एसोसियट निर्देशक माधव शर्मा, निर्माता सुरेश कँडेल र गोविन्द अधिकारी, सह–निर्मातामा शिशिर ज्ञवाली, अनीश सिग्देल र कुन्दन गुप्ता छन् । कार्यकारी निर्माता शङ्कर कोइराला र लाइन प्रोड्युसर कोसिसराज क्षेत्री रहेका छन् ।