Jana Kura
नविना श्रेष्ठ
कार्तिक ३०, २०८२
टोखा काठमाडौं ।– नेपाली कांग्रेस टोखा नगरपालिका–२ ले ऐतिहासिक योगदानका कारण स्वर्गीय तीर्थराम डंगोललाई ‘मरणाेपरान्त कदर–पत्र’ प्रदान गरेको छ। कार्यक्रम भावनात्मक वातावरणमा सम्पन्न भयो, जहाँ उहाँले जीवनभर पार्टी र समुदायका लागि पुर्याएका कामहरूको आत्मीय स्मरण गरियो।
स्वर्गीय डंगोलले नेपाली कांग्रेस काठमाडौँ जिल्ला सभापति रहँदा लोहपुरुष वीर गणेशमान सिंहको शालिक साबिकका.जि. टोखा चण्डेश्वरीस्थित गणेश पोखरीमा पुनःस्थापना गर्ने महत्वपूर्ण भूमिकाले ऐतिहासिक जनआन्दोलनसँग आबद्ध गौरवमय योगदान पुर्याउनुभएको स्मरण गरियो। २०६२ सालको असोज २३ गते सम्पन्न भएको सो अनावरण समारोह सफल बनाउन उहाँको नेतृत्व, साथ–सहयोग र समर्पणलाई उच्च कदर गर्दै कदर–पत्र प्रदान गरिएको हो। कार्यक्रममा उहाँको आत्माको शान्ति तथा बैकुण्ठबासको कामनासमेत व्यक्त गरियो।
कार्यक्रमका प्रमुख अतिथि नेपाली कांग्रेसका केन्द्रीय सदस्य तथा पूर्व स्वास्थ्य तथा जनसङ्ख्या मन्त्री प्रदीप पौडेल, विशेष अतिथि काठमाडौँ कांग्रेस सभापति सबुजकृष्ण बाँनिया, प्रदेश सांसद तथा क्षेत्र नम्बर ५ का सभापति श्यामबहादुर खड्का लगायतका नेताहरू उपस्थित थिए। उनीहरूले गणेशमान सिंह र सुवर्ण शमशेर राणाको त्याग, तपस्या र पार्टीप्रतिको निष्ठालाई वर्तमान पुस्ताले पनि अंगिकार गर्नुपर्नेमा जोड दिए।
त्यसैगरी, गणेशमान सिंहको शालिक पुनःस्थापनामा उल्लेखनीय नेतृत्व भूमिका खेलेका पूर्व रक्षामन्त्री भीमसेनदास प्रधानलाई पनि कदरपत्र प्रदान गरी सम्मान गरिएको थियो।
कार्यक्रममा क्षेत्रीय सभापति हरिहर अधिकारी, पूर्व अध्यक्ष कशीनारायण श्रेष्ठ, सभापति माइला डंगोल, महाधिवेशन प्रतिनिधि बुद्धिलाल डंगोल, संस्थापक सदस्य नवराज श्रेष्ठ, पुराना क्रियाशील सदस्य राममाया खड्गीलगायतलाई पनि कदर–पत्रद्वारा सम्मान गरियो।
टोखामा पार्टीको इतिहास, योगदान र पुराना नेताहरूको समर्पणलाई सम्झने उद्देश्यले आयोजना गरिएको यस कार्यक्रममा उपस्थित सबैले “अघिल्ला पुस्ताले देखाएको बाटो पछ्याउँदै पार्टीका मूल्यमा दृढ हुँदै अगाडि बढ्ने” प्रतिवद्धता व्यक्त गरे।
