Jana Kura
काठमाडौँ, १२ साउन — अमेरिकी सहयोग संस्था मिलेनियम च्यालेञ्ज कर्पोरेशन (एमसिसी) अन्तर्गतका कार्यक्रमहरू नेपालमा पुनः सक्रिय हुने भएका छन्। केही समयअघि स्थगित भएका यी योजनाहरू फेरि निरन्तरता पाउने निश्चित भएको छ।
अर्थ मन्त्रालयले आज एक विज्ञप्ति जारी गर्दै साउन ८ गते प्राप्त पत्रअनुसार एमसिसी परियोजनाहरूलाई अघि बढाउन औपचारिक सिफारिस आएको जानकारी दिएको हो।
विगतमा २०७४ साल भदौ २९ मा नेपाल सरकार र एमसिसीबीच ‘कम्प्याक्ट सम्झौता’ भएको थियो। तर गत माघ ७ गते अमेरिकी राष्ट्रपति कार्यालयको आदेशले सो सम्झौताको पुनरावलोकनका लागि कार्यक्रमहरू रोकिएका थिए।
अब भने पुनरावलोकन प्रक्रिया सकिएको र नेपालका लागि ‘कम्प्याक्ट’ कार्यक्रमलाई निरन्तरता दिन अमेरिकी पक्षबाट हरियो झण्डा देखाइएको अर्थ मन्त्रालयले स्पष्ट पारेको छ।
यस निर्णयसँगै विद्युत प्रसारण लाइन र सडक पूर्वाधार विकासजस्ता महत्वपूर्ण योजनाहरू फेरि गतिशील हुने अपेक्षा गरिएको छ।
