❝ फिफा विश्वकपको उत्साहले चीनको अर्थतन्त्रमा नयाँ उछाल ❞

एजेन्सी । फिफा विश्वकप फुटबलको माहोलले चीनको अर्थतन्त्रलाई समेत चलायमान बनाएको छ। विशेषगरी सांघाइसहित प्रमुख शहरहरूमा विश्वकपको उत्साहले खेलकुदसँगै व्यापार, पर्यटन, मनोरञ्जन र रात्रिकालीन अर्थतन्त्रलाई नयाँ ऊर्जा दिएको छ।

विश्वकपलाई लक्षित गर्दै विभिन्न स्थानमा पप–अप प्रदर्शनी, रेस्टुरेन्ट तथा स्पोर्ट्स बारहरूमा विशेष कार्यक्रम आयोजना गरिएका छन्। शहरका सार्वजनिक स्थानमा ठूला स्क्रिनमार्फत सामूहिक रूपमा खेल हेर्ने व्यवस्था मिलाइएकाले हजारौं समर्थक आकर्षित भइरहेका छन्। यसले स्थानीय व्यापार, खाद्य तथा पेय पदार्थको बिक्री र सेवा क्षेत्रमा उल्लेखनीय वृद्धि भएको जनाइएको छ।

चीनमा फुटबल हेर्ने संस्कृति खेलकुदमा मात्र सीमित नरही सामाजिक जमघट र सहभागितामूलक अनुभवसँग जोडिएको नयाँ व्यावसायिक मोडेलका रूपमा विकसित हुँदै गएको छ।

‘म र मेरा साथीहरू हरेक सप्ताहन्त सँगै फुटबल खेल्छौं। विश्वकपका बेला कसैको घरमा वा नजिकैको स्पोर्ट्स बारमा भेला भएर खेल हेर्छौं। कामपछि सँगै बसेर पेय पदार्थको स्वाद लिँदै खेल हेर्न पाउनु निकै रमाइलो हुन्छ,’ फुटबल समर्थक तियान वुजीले बताए।

अर्का समर्थक वाङ मेङयुआनले युरोपेली फुटबल संस्कृतिप्रतिको आफ्नो रुचिका कारण विश्वकप हेर्नु थप रोचक हुने गरेको बताए। ‘मैले जर्मन र फ्रेन्च भाषा आफैं सिकेको हुँ। त्यसैले मूल भाषाको कमेन्ट्री सुन्दै खेल हेर्दा भाषाको अभ्यास पनि हुन्छ र खेलको आनन्द पनि दोब्बर हुन्छ,’ उनले भने।

फुटबलप्रतिको बढ्दो आकर्षणले स्थानीय खुद्रा व्यापार, होटल, रेस्टुरेन्ट, स्पोर्ट्स बार तथा मनोरञ्जन उद्योगमा सकारात्मक प्रभाव पारेको छ। खेलकुद, मनोरञ्जन र व्यवसायको संयोजनले चीनका सहरी क्षेत्रमा ठूलो संख्यामा दर्शक तान्नुका साथै रात्रिकालीन अर्थतन्त्रलाई समेत बलियो बनाएको छ।

विश्वकपको प्रभाव मैदानभित्र मात्र सीमित नरही उपभोग, सेवा र मनोरञ्जन क्षेत्रमार्फत चीनको अर्थतन्त्रमा समेत नयाँ उत्साह थपिरहेको विश्लेषण गरिएको छ। (सीसीटीभीप्लस)