Jana Kura
काठमाडौँ, ३० वैशाख –
नेपाली चलचित्र उद्योगका लागि ऐतिहासिक दिन — प्रधानमन्त्री केपी शर्मा ओलीले आज काभ्रेपलाञ्चोकको बनेपा नगरपालिका–१० मा निर्माण हुन लागेको अत्याधुनिक चलचित्र छायाङ्कन स्टुडियो ‘सिनेपा’ को शिलान्यास गर्नुभयो।
प्रधानमन्त्री निवास बालुवाटारमा चलचित्र विकास बोर्डको आयोजना रहेको विशेष समारोहमा प्रधानमन्त्री ओलीले औपचारिक रूपमा स्टुडियो निर्माणको शुभारम्भ गर्नुभयो।
बयालिस रोपनी क्षेत्रफलमा फैलिने यो स्टुडियो आधुनिक प्रविधियुक्त, बहुप्रयोगी र अन्तर्राष्ट्रियस्तरको हुनेछ, जसले नेपाली चलचित्रको स्तरमा गुणात्मक फड्को मार्ने अपेक्षा गरिएको छ।
नेपाली चलचित्रले सुरुआत गरेको करिब ६ दशक बितिसक्दा पनि सुविधा सम्पन्न स्थायी छायाङ्कन स्थलको अभाव रहँदै आएको थियो। यस अवस्थामा ‘सिनेपा’ को शिलान्यासलाई चलचित्रकर्मीहरूले दीर्घ प्रतीक्षित सपना पुरा हुने संकेतका रूपमा लिएका छन्।
उत्कृष्ट फिल्म निर्माणका लागि आवश्यक पूर्वाधार प्रदान गर्ने यो स्टुडियोले नेपाली कथानक, संस्कृति र सिर्जनात्मकता प्रवाह गर्न अझ सहज बनाउने विश्वास गरिएको छ।
अब नेपाली सिनेमा आफ्नै माटोमा, आफ्नै शैलीमा, आधुनिक प्रविधिको साथ निर्माण हुने युगतर्फ उन्मुख हुँदैछ।
