❝ सात वर्षदेखि रोकिएको बागमती तीर्थयात्रा यस वर्ष पनि नहुने ❞

 

काठमाडौँ, २२ वैशाख – सभ्यताको मुहान मानिने बागमती नदीको स्रोत वाग्द्वारदेखि कटुवाल दहसम्मको १८ कोशे बागमती तीर्थयात्रा यस वर्ष पनि स्थगित गरिएको छ।

चार दशकसम्म प्रदूषणका कारण रोकिएको यो यात्रा पशुपति क्षेत्र विकास कोषका तत्कालीन सदस्य सचिव डा. प्रदीप ढकालको पहलमा २०७५ र २०७६ सालमा पुनः सुरु भएको थियो। ती वर्षहरूमा १७ दिनको यात्रा छोट्याएर सात र नौ दिनमा सम्पन्न गरिएको थियो।

कोषले २०७७ सालदेखि १७ दिने परम्परागत यात्रालाई पुनःस्थापना गर्ने योजना गरे पनि कोरोना महामारीपछि निरन्तर सात वर्षदेखि यात्रा हुन सकेको छैन। स्थानीयवासीहरूको गुनासो छ— महामारीपछि कोषको चासोको अभावले यात्रा रोकिएको हो।

कोषको संस्कृति महाशाखाका निमित्त प्रमुख ईश्वरमान राजभण्डारीले पनि यस वर्ष कुनै तयारी नभएको पुष्टि गर्नुभयो।

बागमतीको तटमा रहेको १६५ भन्दा बढी तीर्थस्थलमा स्नान, पूजा, दर्शन तथा तन्त्र साधनासहित गरिने यो यात्रा नेमुनिले प्रारम्भ गरेको विश्वास गरिन्छ।

पशुपति आगम घरका पुजारी मदन भट्टका अनुसार, तीर्थयात्राले बागमती नदीको स्वच्छता र धार्मिक चेतनालाई जीवन्त राख्ने विश्वास गरिँदै आएको छ। तर, यात्राको स्थगनले बागमती शुद्धीकरण अभियानमा थप चुनौती थपिएको छ।