Jana Kura
सुदूरपश्चिम, १२ मङ्सिर /नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ ले देशमा उत्पन्न राजनीतिक सङ्कट समाधानका लागि वामपन्थीदेखि गैरवामपन्थीसम्मका सबै देशभक्त शक्तिलाई एउटै मोर्चामा ल्याउनुपर्ने आवश्यकता औँल्याउनुभयो।
नेकपाको पार्टी एकता सन्देश सभा धनगढीबाट सुरु गर्दै पूर्वप्रधानमन्त्री दाहालले विभिन्न कम्युनिष्ट घटकहरू एक भएर बनेको नयाँ पार्टीमा अन्य वामपन्थी र देशप्रेमीहरू सहजै अटाउन सक्ने वातावरण तयार भएको बताउनुभयो। भदौ २३–२४ का घटनापछि बनेको संवेदनशील परिस्थितिको समाधानका लागि प्रगतिशील र लोकतान्त्रिक शक्ति एउटै मोर्चामा जोड्ने प्रयास जारी रहेको उहाँको भनाइ थियो।
“हिजोका कमजोरीहरूको समीक्षासहित महान् उद्देश्य बोकेर हामीले नयाँ बाटो कोरेका छौँ,” दाहालले भने, “यो गोरेटोबाट अघि बढ्दै नेपालकै नम्बर–१ पार्टी नेकपा बन्नेछ।”
देशभरका क्रान्तिकारीको आशा र भरोसा नेकपा प्रति बढिरहेको उल्लेख गर्दै उहाँले बृहत् शक्ति निर्माणका लागि सबैलाई पार्टीमा एकताबद्ध हुन अपिल गर्नुभयो। अहिलेको सङ्कटको समाधान निर्वाचनमै रहेको भन्दै दाहालले नेता–कार्यकर्तालाई चुनावी वातावरण बनाउन सक्रिय हुन निर्देशन पनि दिनुभयो।
पार्टीका सह–संयोजक एवं पूर्वप्रधानमन्त्री माधवकुमार नेपालले विगतका टुटफुटबाट शिक्षा लिँदै नेकपा स्वच्छ र जिम्मेवार राजनीतिक यात्रा सुरु गर्न लागेको बताउनुभयो। “समाज रूपान्तरणको लक्ष्यसहित बनेको नयाँ क्रान्तिकारी पार्टीले भ्रष्टाचार र बेथितिको अन्त्य गर्दै जनताको पक्षमा काम गर्ने दृढ संकल्प गरेको छ,” उहाँले भन्नुभयो।
त्यसैगरी, नेता भीमबहादुर रावलले देशको मुहार बदल्ने लक्ष्यसहित नेकपा अगाडि बढेको बताउँदै स्वाधीनता, समृद्धि र परिवर्तनको यात्रामा पार्टी प्रतिबद्ध रहेको उल्लेख गर्नुभयो। कार्यक्रममा प्रकाश शाह, गिरीराजमणि पोखरेल, भानुभक्त जोशीलगायतले पनि पार्टी गठन र समसामयिक राजनीतिको बारेमा आफ्ना धारणा राखेका थिए।
झण्डै एक दर्जनभन्दा बढी वाम घटक मिलेर बनेको नेपाली कम्युनिष्ट पार्टी (नेकपा) ले एकता सन्देश अभियान पहिलोपटक धनगढीबाट सुरु गरेको हो। सभा शान्तिपूर्ण रुपमा सम्पन्न होस् भन्ने उद्देश्यले ठूलो संख्यामा नेपाल प्रहरी र सशस्त्र प्रहरी बल परिचालन गरिएको थियो।
