Jana Kura
काठमाडौँ, ७ कात्तिक: नेपाली कांग्रेसका महामन्त्रीद्वय विश्वप्रकाश शर्मा र गगनकुमार थापाले निर्वाचन आयोगको सूचना अनुसार यही कात्तिक मसान्तभित्र मतदाता नामावली दर्ता प्रक्रियामा व्यापक सक्रियता बढाउन पार्टीका सबै तहमा अपिल गर्नुभएको छ।
उहाँहरूले छठपर्वपछि पार्टीका प्रदेश कार्यसमितिका पदाधिकारी र सदस्यहरूलाई फरक–फरक जिल्लामा ‘सम्पूर्ण ध्यान, मतदाता दर्ता अभियान’मा केन्द्रित हुन निर्देशन गर्नुभएको छ। संयुक्त परिपत्रमार्फत जिल्ला कार्यसमिति र मातहतका सबै तहका कार्यकर्तालाई अन्य कार्य रोक्ने र मतदाता दर्ता अभियानमा सक्रिय रूपमा लाग्न निर्देशन गरिएको छ।
महामन्त्रीद्वयका अनुसार, नागरिकले जिल्ला निर्वाचन कार्यालय वा निर्वाचन आयोगले तोकेको मतदाता दर्तास्थलमा कात्तिक ३० गतेसम्म नाम दर्ता गर्न सक्नेछन्। दर्ताका लागि नेपाली नागरिकताको प्रमाणपत्र अनिवार्य रहेको र नागरिकता नभएका युवाहरूले सोही दिन नागरिकता बनाएर मतदाता नामावलीमा नाम दर्ता गर्न सक्ने जानकारी पनि दिइएको छ।
