८ साउन, पाटन।
जननायक बिपी कोइरालाको ४३औँ स्मृति दिवसको अवसरमा आयोजित विशेष संवाद कार्यक्रममा उपप्रधानमन्त्री तथा सहरी विकासमन्त्री प्रकाशमान सिंहले राजनीतिक स्थायित्व नै आर्थिक रुपान्तरणको जग भएको स्पष्ट पार्नुभयो।
ललितपुरको पाटनमा बिपी चिन्तन प्रतिष्ठानले आयोजना गरेको “नेपालमा आर्थिक रुपान्तरणको अवसर र चुनौती” विषयक कार्यक्रममा बोल्दै उपप्रधानमन्त्री सिंहले वर्तमान राजनीतिक प्रणालीमा दुई वा तीन दलको सहकार्य बिना सरकार बन्न नसक्ने अवस्था रहेको उल्लेख गर्नुभयो। “राजनीतिक स्थायित्व बिना विकास सम्भव हुँदैन,” उहाँले भन्नुभयो, “दिगो आर्थिक रुपान्तरणका लागि जनताको अधिकार सुनिश्चित गर्दै, जिम्मेवार नेतृत्वको खाँचो छ।”
उहाँले नेपालको समृद्धिको सपना साकार पार्न विकासमा सबैलाई समेट्ने गणेशमान सिंहले २०४६ सालमा अघि सारेको कार्यगत एकताको मार्गलाई अहिलेको गठबन्धन सरकारले निरन्तरता दिएको बताउनुभयो।
बिपीको आदर्श र कांग्रेसको प्रतिबद्धता
बिपी कोइरालाको विचारधारा र सिद्धान्तलाई सम्झँदै उपप्रधानमन्त्री सिंहले उहाँको नेतृत्वमा गहिरो प्रभाव भएको बताउनुभयो। “कसैसँग सम्झौता नगर्ने दृढताका साथ बिपीले लोकतान्त्रिक मूल्यलाई जोगाउनुभयो,” उहाँले भन्नुभयो, “नेपाली कांग्रेसले त्यो नैतिक धरातल कहिल्यै नछोडेको छ।”
कार्यक्रममा राष्ट्रियसभा सदस्य कृष्णप्रसाद पौडेलले २०४६ सालपछि नेपाली कांग्रेसले अवलम्बन गरेको उदार आर्थिक नीतिले निजी क्षेत्रलाई सक्रिय बनाएको र त्यसबाट अर्थतन्त्रमा उल्लेखनीय सुधार आएको बताउनुभयो। “अहिलेको अवस्थासम्म आइपुग्दा कांग्रेसको योगदान ऐतिहासिक छ,” पौडेलले भन्नुभयो, “अवरोध गर्ने कानुनहरू संशोधन गरेर पुँजीगत खर्च वृद्धि गर्न आवश्यक छ।”
लोकतन्त्रका लागि एकजुटताको आह्वान
कांग्रेस काठमाडौंका जिल्ला सभापति सबुजकृष्ण बानियाँले लोकतन्त्र ल्याउन बलिदान दिएका अग्रज नेताहरू बिपी, गणेशमान र कृष्णप्रसादको संघर्षको स्मरण गर्दै जनताको अपेक्षाअनुसार काम गर्न लोकतन्त्रवादी शक्ति एकजुट हुनुपर्ने धारणा राख्नुभयो।
बिपी चिन्तन प्रतिष्ठानका अध्यक्ष हरिबोल भट्टराईले गरिबी अन्त्य र आर्थिक रुपान्तरणका लागि बिपीले सुझाएको “लोकतान्त्रिक समाजवाद” आजको दिनमा अझै सान्दर्भिक रहेको बताउनुभयो। “नेपाललाई समृद्ध बनाउने सपना पूरा गर्न आर्थिक क्रान्ति अपरिहार्य छ,” उहाँले भन्नुभयो।
स्वास्थ्य बिमा बोर्डका कार्यकारी निर्देशक डा. रघुराज काफ्लेले पनि वर्तमान आर्थिक चुनौतीहरू र सम्भावनाका विषयमा प्रस्तुति दिंदै, युवाहरूले चाहेको वास्तविक परिवर्तनका लागि राज्य र समाज दुवैले जिम्मेवारीपूर्वक अघि बढ्नुपर्ने धारणा राख्नुभयो।