काठमाडौँ, १२ जेठ – प्रधानमन्त्री केपी शर्मा ओलीले नेपाल भ्रमणमा आउने पर्यटकहरूलाई कुनै पनि कानुनी वा प्रशासनिक झन्झटमा नपार्न सबैलाई आग्रह गर्नुभएको छ। उहाँले नेपालमा आउने पाहुनालाई हर्ष, सम्मान र सहजताका साथ स्वागत गर्न सबै सरोकारवालालाई निर्देशन दिनुभएको हो।
संस्कृति, पर्यटन तथा नागरिक उड्डयन मन्त्रालयद्वारा सिंहदरबारमा आयोजित राष्ट्रिय पर्यटन संवाद कार्यक्रममा प्रधानमन्त्री ओलीले पर्यटन वृद्धि र समृद्धिको बाटो सुशासनमार्फत खोल्नुपर्नेमा जोड दिनुभयो। उहाँले अध्यागमन कार्यालयमा यात्रुलाई अनावश्यक दुःख दिने, लगेज हराउने, सीमामा बाहना देखाउने जस्ता व्यवहार तत्काल अन्त्य गर्नुपर्ने बताउनुभयो।
“अब नेपाल दुर्गम रहेन, स्याउ जुम्लाबाट सिधै काठमाडौँ आउन थालेको छ। चीनसँग १४ वटा नाका खुलेका छन्, किमाथाङ्कामा पुल बन्दैछ,” प्रधानमन्त्री ओलीले भन्नुभयो, “केही नभएका ठाउँमा सबै कुरा एकैपटक गर्न समय लाग्छ, तर अब ‘केही भएन’ भनेर चिन्ता गर्नुपर्ने बेला छैन। पर्यटन हाम्रो समृद्धिको आधार हो, यसमा कुनै कमजोरी गर्न मिल्दैन।”
उहाँले युरोपेली संघले अझै नेपाललाई उडानका लागि कालोसूचीमा राखेकोप्रति चिन्ता व्यक्त गर्दै, हवाई सुरक्षाका मापदण्ड पुरा गर्न र सम्बन्धित दुई निकायलाई छुट्याउने प्रक्रिया तत्काल अघि बढाउन निर्देशन दिनुभयो।
कार्यक्रममा पर्यटन प्रवर्द्धनसँग सम्बन्धित धेरै विषयहरूमा छलफल भयो – काठमाडौँ–पोखरा सडकको समयमै निर्माण, सिमाना नाकामा सहज पहुँच, युरोपियन देशहरूसँग सिधा हवाई सम्पर्क, डिजिटल प्रणालीको विकास, नेपाल वायुसेवा निगमको पुनःसंरचना, सगरमाथा संवादका सिफारिस कार्यान्वयन, हिमालय सफाइजस्ता पहलहरूमा पनि जोड दिइयो।
कार्यक्रममा संघ, प्रदेश र निजी क्षेत्रका प्रतिनिधिहरूको उपस्थिति रहेको थियो। सहभागीहरूबाट आएका सुझावका आधारमा एउटा कार्ययोजना पनि प्रस्तुत गरिएको थियो, जसले नेपालको पर्यटन भविष्यलाई अझ उज्यालो बनाउन सहयोग गर्ने अपेक्षा गरिएको छ।