काठमाडौँ, १४ वैशाख –
प्रधानमन्त्री केपी शर्मा ओलीले आमा पृथ्वीको प्रत्यक्ष स्वरुप भएको बताउँदै, आमाप्रति सबैको समर्पण र कृतज्ञताको भावना झन् गहिरो होस् भन्ने शुभकामना व्यक्त गर्नुभएको छ।
मातातीर्थ औँसी अर्थात् आमाको मुख हेर्ने विशेष दिनका अवसरमा आज सामाजिक सञ्जालमार्फत उहाँले गहिरो संवेदनाले भरिएको सन्देश दिनुभएको हो। प्रधानमन्त्री ओलीले सबै आमाप्रति हार्दिक श्रद्धा, सम्मान र समर्पण व्यक्त गर्नुका साथै, आमा भन्ने शब्दमा समाहित ममता, न्यानो र त्यागप्रति गहिरो सम्मान प्रकट गर्नुभएको छ।
आफ्नै बाल्यकालको स्मृतिलाई भावुक हुँदै सम्झनुहुँदै, प्रधानमन्त्री ओलीले लेख्नुभएको छ, “मेरो स्मृतिमा आमाको अनुहार त्यति स्पष्ट छैन, किनभने चार वर्षको नहुँदै मैले आमाको न्यानो काख गुमाएँ। मेरा लागि जन्मभूमि नै आमाको प्रतिरूप बन्नुभयो।”
आमाको अनुपस्थितिमा पनि, उहाँको मनमा आमाको माया र छायाँ कहिल्यै मेटिएको छैन। “आज मातातीर्थ औँसी, आमाको मुख हेर्ने दिन। आमाको मुहार धमिलो सम्झना आइरहेछ,” भन्दै उहाँले भावुक शब्दमार्फत आमा प्रतिको आफ्नो गहिरो अभाव र श्रद्धा पोख्नुभएको छ।
प्रधानमन्त्री ओलीले सबैलाई आमा प्रतिको प्रेम, आदर र कृतज्ञताको भावनालाई अझ शुद्ध र प्रगाढ बनाउन आह्वान गर्दै मातातीर्थ औँसीको शुभकामना दिनुभएको छ।