काठमाडौँ, १४ माघ ।विश्व प्रसिद्ध रुसी लेखक अन्तोन चेखोभको १६५ औँ जन्मोत्सवमा साहित्यिक साँझ काठमाडौंमा सम्पन्न भएको छ। विश्व साहित्य इतिहासमा रूसी लेखक एवं साहित्यकार अन्तोन चेखोभले दिएको योगदान शीर्षस्थानमा रहेको छ । विश्वका कतिपय लेखकले चेखोवलाई कथा शिरोमणी मानेका छन् । रूसी साहित्यको काव्य विधामा पुश्किनको जुन स्थान छ गद्य विधामा चेखोभको त्यही स्थान छ भनेर लेभ टोल्सटोइ भन्दछन् । आफ्ना पात्रहरूको चरित्र चित्रणमा चेखोभ अद्वितीय छन् । उनी समाज जस्तो छ त्यसलाई त्यसरी नै इमानदारीपूर्वक प्रस्तुत गर्छन् । यी फिजिकल डाक्टर थिए तर व्यक्ति र समाजको प्रखर मनोविज्ञान विश्लेषक पनि थिए ।
यिनै लोकप्रिय लेखकको सम्झनामा शुक्रबार जनवरी २४, २०२५ मा नेपाल–रुस साहित्य समाज (नेरुसास) र रुसी सदन काठमाडौँको सहकार्यमा रुसी सांस्कृतिक केन्द्रको पुस्तकालय हलमा एक साहित्यिक साँझ सम्पन्न भयो । कार्यक्रमले रुसी साहित्य र संस्कृतिका थुप्रै प्रेमीहरूका साथै नेरुसास, मित्रकुञ्ज, नेपाल–रुस मैत्री र सांस्कृतिक सङ्घ, पुस्तकालयका पाठक र भाषा पाठ्यक्रमका विद्यार्थीहरूलाई एकै ठाउँमा जमघट गरायो ।
सांस्कृतिक केन्द्र पुस्तकालयका प्रमुख भावना न्यौपानेले रुसी लेखक चेखभको जीवन सृजनाको बारेमा सङ्क्षिप्त परिचय प्रस्तुत गर्नुभयो ।
नेरुसासका नवनियुक्त अध्यक्ष विष्णुबहादुर सिंहले नेपाल र रुसबिचको सांस्कृतिक सम्बन्धलाई मजबुत बनाउन यस्ता कार्यक्रमको महत्व हुने बताउनुभयो ।
उहाँले नवगठित नेपाल–रुस साहित्य समाजको पत्र रुसी सदनका निर्देशक अन्तोन मास्लोभलाई हस्तान्तरण गर्नुभयो ।
लेखक, नेरुसासका महासचिव तथा मित्रकुञ्जका उपाध्यक्ष रामविन्दु श्रेष्ठले चेखोभको सृजनासँगको आफ्नो परिचय रुसी भाषा शिक्षिकामार्फत पाएको र विशेषगरी उनको चर्चित व्यङ्ग्य कथा ‘कारिन्दाको मृत्यु’ को पठनबाट सुरू भएको बताउनुभयो ।
लेखक रोशन शेरचनले चेखभका सृजनाहरूले मनभित्रको अथाह पीडालाइ सजीव रूपमा प्रस्तुत गर्नसक्ने क्षमता भएको बताउनुभयो ।
कार्यक्रमको दोस्रो भागमा रुसी लेखिका तच्याना च्छेद्वारा सम्पादन गरिएको ‘मार्गको निरन्तरता’ सङ्ग्रहको लेखनीमा संलग्न लेखकद्वय विष्णुबहादुर सिंह र रामविन्दु श्रेष्ठलाई उपहारस्वरूप मस्कोबाट प्राप्त पुस्तक प्रदान गरिएको थियो ।
सोही अवसरमा रुसी सदनका निर्देशक अन्तोन मास्लोभले दुई देशबिचको साहित्यिक गतिविधिमा सक्रिय सहभागितामा पु¥याएको योगदानको कदरस्वरूप रुसी लेखक सङ्घ, मस्को सहर सङ्गठनले पठाएको सम्मानपत्र रामविन्दु श्रेष्ठलाई प्रदान गर्नुभयो ।
रुसी हाउसका निर्देशक मास्लोभले सबै सहभागी र आयोजकहरूलाई धन्यवाद दिँदै यस्ता भेटघाटले दुई देशबिचको सम्बन्धको क्षितिज फराकिलो बनाउन र मानिसबिचको मित्रतालाई बलियो बनाउन महत्वपूर्ण भूमिका खेल्छ भन्नुभयो ।
