-नविना श्रेष्ठ
काठमाडौं,असार १६,२०८१/रिङरोडको कलंकी-धोबीखोला सडकखण्ड विस्तारको मागसहित नेपाली कांग्रेसका प्रतिनिधि सभा सांसद प्रदीप पौडेलले पैदल यात्राबाट दबाब दिएका छन् । दबाब यात्रा कलंकी-धोबीखोला सडक विस्तार तुरून्त अघि बढाउन दबाब दिने उद्देश्यले पौडेलले असार १५ गते शनिबार सामूहिक यात्रा गरेको हो। उनले यो यात्रामा सहयोग गर्न काठमाडौंबासीलाई आह्वान समेत गरे। पौडेलका अनुसार शनिबार बिहान ७ बजेदेखि कलंकीबाट दबाब यात्रा सुरू गरेको थियो। भने बिहान करिब ११.०० बजे धोबीखोला पुगि यात्रा समापन गरेको थियो।
‘रिङरोडको कलंकी-धोबीखोलालगायत क्षेत्रका बासिन्दालाई यो दबाब यात्रामा साथ दिन आह्वान गरे। कलंकी-धोबीखोला करिब १३ कि.मी सडक विस्तार गर्ने काम पनि अघि बढ्न सकेको छैन। सडक छेउका रूख कटान गरिएको थियो। ‘रिङरोडको यस खण्ड समयमै नबनेकोले यस क्षेत्रका मानिस पीडित छन्। पानी परेका बेला हिलाम्मे र घाम लागेका बेला धुलोले स्थानीय बासिन्दालाई सास्ती दिएको छ,’ उनले भने, ‘अब बर्खा लाग्यो, रिङरोडमा खेत रोपिदिए हुन्छ, हिलाम्मे छ।’ यस खण्डमा छ हजारभन्दा बढी सटर छन्। धुलो र हिलोका कारण व्यापार छैन। ‘चार वर्षदेखि यस क्षेत्रका बासिन्दाले दु:ख पाएका छन्।
प्रदूषणले गर्दा स्वास्थ्य बिग्रेको छ,’ उनले भने, ‘यो सडक विस्तारमा दबाब दिन नागरिक यात्रा गरेको हो। पौडेलसहित कांग्रेस र रास्वपाका सांसदहरूले प्रतिनिधि सभामा यसअघि रिङरोडको यो खण्ड तत्काल निर्माण अघि बढाउन माग गर्दै जरूरी सार्वजनिक महत्वको प्रस्तावसमेत छलफलका लागि दर्ता गरेका छन्। रिङरोडको कलंकी-धोबीखोला खण्ड चिनियाँ लगानीमा बनाउन पनि अन्यौलमा परेको छ। सो सांसदहरूले चीनले नबनाउने हो भने आफ्नै स्रोतबाट नेपाल सरकारले यो सडक बनाउनुपर्ने बताइरहेका छन्।
