❝ राष्ट्रपति रामचन्द्र पौडेलद्वारा सपनतीर्थमा पूजाअर्चना ❞

काठमाडौँ, १ वैशाख: राष्ट्रपति रामचन्द्र पौडेलले टोखा नगरपालिकास्थित सपनतीर्थमा पूजा अर्चना गर्नुभएको छ । राष्ट्रपतिले प्रथम महिला सविता पौडेलसहित सपनतीर्थमा पूजार्चना गर्नुभएको हो । राष्ट्रपति पौडेललाई काठमाडौँ क्षेत्र नं ५ का सांसद प्रदीप पौडेल, टोखा नगरपालिकाका प्रमुख प्रकाश अधिकारी, उपप्रमुख मुरारी तामाङ, प्रमुख प्रशासकीय अधिकृत शेरबहादुर विसी, सपनातीर्थ क्षेत्र विकास समितिका अध्यक्ष देवराज डङ्गोल लगायतले स्वागत गर्नुभएको थियो । सपनतिर्थ मन्दिरमा राष्ट्रपति पौडेलले टाेखाका जिवित देवि गणेश कुमारीबाट पनि दर्शन भेट गर्नुभएको थियो । आज सपनतीर्थमा स्नान मेला पनि सुरु भएको छ । सपनतीर्थ स्नान गर्न काठमाडौँ उपत्यकासहित देशका विभिन्न भागबाट भक्तजन आएका छन् । यहाँ भक्तजनहरुको घुइँचो लागेको छ। सपनतीर्थमा स्नान गरेपछि कुष्ठरोग निको हुने जनविश्वास छ । सपनतीर्थमा मेलासँगै टोखामा विस्का नखः (जात्रा) पनि सुरु भएको नेवा गुथिः टोखाका अध्यक्ष रमेश नापितले जानकारी दिनुभयो ।टोखा विस्का नखः (जात्रा) वैशाख ४ गतेसम्म सञ्चालन हुनेछ ।

कभर फोटो सौजन्य/गणेशमान श्रेष्ठ