❝ युवा जनशक्तिलाई स्वदेशमै टिक्ने वातावरण सिर्जना गर्नु जरुरी: पूर्वप्रधानमन्त्री खनाल ❞

 २१ असोज ः युवा जनशक्तिलाई स्वदेशमै टिक्ने वातावरण सिर्जना गर्नु जरुरी रहेको नेकपा एकीकृत समाजवादीका नेता तथा पूर्वप्रधानमन्त्री झलनाथ खनालले बताउनुभएको छ ।  युवालाई स्वदेशमा टिकाउन रोजगारी वृद्धि, औद्योगिकीकरण, कृषि क्षेत्रमा व्यापक सुधार र विकास गर्नुपर्नेमा पूर्वप्रधानमन्त्री खनालले जोड दिनुभयोे । पार्टीको समाजवादी जागरण अभियानका क्रममा भैरहवामा  आज समाजवादी प्रेस सङ्गठन नेपाल, रुपन्देही शाखाले आयोजना गरेको पत्रकार सम्मेलनमा मुलुकमा रोजगारी वृद्धि, सुशासन, शिक्षा, स्वास्थ्य र कृषिलाई प्राथमिकता दिनका साथै तिनलाई केन्द्रमा राखेर पार्टीले जागरण अभियान चलाइरहेको नेता खनालले बताउनुभयो । यस अभियानले समाजवादतर्फ जान मद्दत गर्ने उल्लेख गर्दै उहाँले समाजवादी व्यवस्थासहितको नयाँ ध्रुवीकरणको आवश्यकता पनि औँल्याउनुभयो । “समाजवादमा जानका लागि आवश्यक परे विचार मिल्ने कम्युनिस्ट एक हुनुपर्ने हुन्छ”, नेता खनालले भन्नुभयो “यसका लागि नयाँ ध्रुवीकरण जरुरी छ ।”